ഹോം തിയേറ്റർ വാങ്ങുമ്പോൾ അറിയണം; 5.1, ഡോൾബി അറ്റ്‌മോസ്, ഡി.ടി.എസ് എന്നിവ തമ്മിലുള്ള വ്യത്യാസം

ഒരു സിനിമ കാണുമ്പോൾ തലയ്ക്ക് മുകളിലൂടെ ഹെലികോപ്റ്റർ പറന്നുപോകുന്ന ശബ്ദം കേൾക്കുന്നു. തൊട്ടുപിന്നിൽ എന്തോ വീഴുന്നതുപോലെ തോന്നുന്നു. മഴ പെയ്യുമ്പോൾ വെള്ളത്തുള്ളികൾ ചുറ്റും പതിക്കുന്ന അനുഭവവും ലഭിക്കുന്നു. ഇതെല്ലാം സ്ക്രീനിൽ കാണുന്ന കാഴ്ചയുടെ മികവ് മാത്രമല്ല, അതിന് പിന്നിൽ പ്രവർത്തിക്കുന്ന ശബ്ദസാങ്കേതികവിദ്യയുടെ കൂടി മികവാണ്.

ഒരു പുതിയ സൗണ്ട്ബാറോ ഹോം തിയേറ്ററോ വാങ്ങാൻ ഇറങ്ങുമ്പോൾ 2.1, 5.1, 7.1, ഡോൾബി അറ്റ്‌മോസ്, ഡി.ടി.എസ് തുടങ്ങിയ പേരുകൾ കാണാം. വിലയിലും രൂപത്തിലും മാത്രമല്ല, ഇത്തരം സാങ്കേതികവിദ്യകളിലും ഓരോ ഉപകരണവും വ്യത്യസ്തമാണ്. എന്നാൽ ഇവ തമ്മിലുള്ള വ്യത്യാസം എന്താണ്? കൂടുതൽ സ്പീക്കറുകൾ ഉണ്ടെങ്കിൽ ശബ്ദം മികച്ചതാകുമോ? അതോ ഡോൾബി അറ്റ്‌മോസ് ഉള്ള ഉപകരണം വാങ്ങുന്നതാണോ നല്ലത്?

വലിയ സാങ്കേതിക പരിജ്ഞാനമൊന്നും ആവശ്യമില്ലാതെ ഈ ശബ്ദലോകത്തെ ചില കാര്യങ്ങൾ ലളിതമായി മനസ്സിലാക്കാം.

1. എന്താണ് 5.1 ചാനൽ സൗണ്ട്?

ഹോം തിയേറ്ററുകളിലും സൗണ്ട്ബാറുകളിലും 2.1, 5.1, 7.1 എന്നിങ്ങനെയുള്ള അക്കങ്ങൾ കാണാറില്ലേ? ഇവ വെറുതെയുള്ള നമ്പറുകളല്ല. ഒരു ശബ്ദസംവിധാനത്തിൽ ശബ്ദം എങ്ങനെയൊക്കെ ക്രമീകരിച്ചിരിക്കുന്നു എന്നതിന്റെ സൂചനയാണിത്.

- 5.1 സംവിധാനം: മുന്നിൽ ഇടതും വലതും ഓരോ സ്പീക്കർ, സംഭാഷണങ്ങൾ വ്യക്തമായി കേൾക്കാൻ നടുവിൽ ഒരു സ്പീക്കർ, പിന്നിൽ ഇടതും വലതുമായി രണ്ട് സ്പീക്കറുകൾ. ആകെ അഞ്ച് പ്രധാന ശബ്ദ ചാനലുകൾ.

- .1 എന്നതിന്റെ അർഥം: ആഴത്തിലുള്ള ബേസ് ശബ്ദങ്ങൾ നൽകുന്ന സബ്‌വൂഫറിനെയാണ് ഇത് സൂചിപ്പിക്കുന്നത്.

- 7.1 സംവിധാനം: 5.1-ലെ അഞ്ച് പ്രധാന ചാനലുകൾക്ക് പുറമെ രണ്ട് ശബ്ദ ചാനലുകൾ കൂടി ഉൾപ്പെടുന്നു. ഇതിലൂടെ ചുറ്റുമുള്ള ശബ്ദാനുഭവം കൂടുതൽ വിപുലമാക്കാം.അതായത്, സിനിമയിൽ ഒരു കാർ പിന്നിലൂടെ കടന്നുപോകുമ്പോൾ അതിന്റെ ശബ്ദം പിന്നിൽനിന്ന് കേൾക്കാനും, കഥാപാത്രങ്ങളുടെ സംഭാഷണം മുന്നിൽനിന്ന് വ്യക്തമായി അനുഭവിക്കാനും ഈ സംവിധാനം സഹായിക്കുന്നു.

2. എന്താണ് ഡോൾബി അറ്റ്‌മോസ്?

പരമ്പരാഗത ശബ്ദസംവിധാനങ്ങളിൽ ശബ്ദം മുന്നിൽനിന്നും പിന്നിൽനിന്നും വശങ്ങളിൽനിന്നുമാണ് പ്രധാനമായും അനുഭവപ്പെടുന്നത്. എന്നാൽ ശബ്ദത്തിന് മുകളിലേക്കുള്ള ദിശ കൂടി നൽകുന്ന സാങ്കേതികവിദ്യയാണ് ഡോൾബി അറ്റ്‌മോസ്.ഉദാഹരണത്തിന്, ഒരു സിനിമയിൽ ഹെലികോപ്റ്റർ തലയ്ക്ക് മുകളിലൂടെ പറന്നുപോകുന്ന രംഗമുണ്ടെന്ന് കരുതുക. സാധാരണ ശബ്ദസംവിധാനത്തിൽ അതിന്റെ ശബ്ദം ചുറ്റുപാടുനിന്ന് കേൾക്കുമ്പോൾ ഡോൾബി അറ്റ്‌മോസിൽ മുകളിൽനിന്ന് വരുന്നതുപോലുള്ള അനുഭവവും ലഭിക്കും.ഇതിനായി ചില സൗണ്ട്ബാറുകളിൽ മുകളിലേക്ക് ശബ്ദം പുറപ്പെടുവിക്കുന്ന പ്രത്യേക സ്പീക്കറുകളുണ്ട്. ഇവയുടെ ശബ്ദം സീലിങ്ങിൽ തട്ടി തിരിച്ചെത്തിയാണ് ഉയരത്തിലുള്ള ശബ്ദാനുഭവം സൃഷ്ടിക്കുന്നത്.

5.1.2 എന്ന് കണ്ടാൽ എന്താണ് അർഥം?

• ആദ്യത്തെ 5 – അഞ്ച് പ്രധാന ശബ്ദ ചാനലുകൾ.
• രണ്ടാമത്തെ 1 – ഒരു ബേസ് സ്പീക്കർ.
• അവസാനത്തെ 2 – ഉയരത്തിലുള്ള ശബ്ദാനുഭവം നൽകുന്ന രണ്ട് ചാനലുകൾ.

3. എന്താണ് ഡി.ടി.എസ്, ഡി.ടി.എസ്-എക്സ്?

ഡോൾബി അറ്റ്‌മോസിന് സമാനമായി സിനിമകളിൽ ചുറ്റുപാടുനിന്നുള്ള ശബ്ദാനുഭവം നൽകുന്ന മറ്റൊരു സാങ്കേതികവിദ്യയാണ് ഡി.ടി.എസ്). മുമ്പൊക്കെ തിയറ്ററുകളിൽ ഈ സാ​ങ്കേതിക വിദ്യ ആയിരുന്നു. ഇതിന്റെ ഏറ്റവും ശ്രദ്ധേയമായ പതിപ്പുകളിലൊന്നാണ് ഡി.ടി.എസ്-എക്സ്. ശബ്ദങ്ങൾ ഒരു പ്രത്യേക സ്പീക്കറിൽ മാത്രം ഒതുക്കാതെ അവയുടെ ദിശയും സ്ഥാനവും അനുസരിച്ച് കൂടുതൽ സ്വാഭാവികമായി കേൾപ്പിക്കുകയാണ് ഇതിന്റെ ലക്ഷ്യം.

ഡോൾബി അറ്റ്‌മോസും ഡി.ടി.എസ്-എക്സും തമ്മിൽ ശബ്ദം കൈകാര്യം ചെയ്യുന്ന രീതിയിലും പ്രവർത്തനത്തിലും വ്യത്യാസങ്ങളുണ്ട്. എന്നാൽ ഒന്നാണ് എപ്പോഴും മികച്ചതെന്ന് പറയാനാവില്ല. ഉപയോഗിക്കുന്ന സിനിമയുടെ ഓഡിയോ നിലവാരം, ഉപകരണങ്ങളുടെ പിന്തുണ, മുറിയുടെ ക്രമീകരണം എന്നിവയെല്ലാം അനുഭവത്തെ സ്വാധീനിക്കും.

4. സാധാരണക്കാർ ഏത് തിരഞ്ഞെടുക്കണം?

എല്ലാവർക്കും ഏറ്റവും വിലകൂടിയ ഹോം തിയേറ്റർ തന്നെ വേണമെന്നില്ല. ഉപയോഗിക്കുന്ന മുറിയുടെ വലുപ്പവും സിനിമ കാണുന്ന രീതിയും ബജറ്റുമാണ് പ്രധാനമായും പരിഗണിക്കേണ്ടത്.

1. ചെറിയ മുറികൾക്കും സാധാരണ ടിവി കാഴ്ചയ്ക്കും: 2.1 സൗണ്ട്ബാർ മതിയാകും. വാർത്തകൾ, പാട്ടുകൾ, സാധാരണ സിനിമകൾ എന്നിവയുടെ ശബ്ദനിലവാരം മെച്ചപ്പെടുത്താൻ ഇത് സഹായിക്കും.

2. സിനിമകൾ കൂടുതൽ ആസ്വദിക്കുന്നവർക്ക്: 5.1 ശബ്ദസംവിധാനം നല്ലൊരു തിരഞ്ഞെടുപ്പാണ്. മുന്നിലും പിന്നിലുമായി ശബ്ദം അനുഭവിക്കാൻ ഇത് സഹായിക്കും.

3. കൂടുതൽ മികച്ച സിനിമാ അനുഭവത്തിന്: ഡോൾബി അറ്റ്‌മോസ് പിന്തുണയുള്ള 3.1.2 അല്ലെങ്കിൽ 5.1.2 സൗണ്ട്ബാർ പരിഗണിക്കാം. എന്നാൽ അതിന്റെ പൂർണ അനുഭവം ലഭിക്കാൻ സിനിമയും ടിവിയും സൗണ്ട്ബാറും ആവശ്യമായ സാങ്കേതികവിദ്യയെ പിന്തുണയ്ക്കണം.സംഭാഷണങ്ങൾ വ്യക്തമായി കേൾക്കാൻ സെന്റർ സ്പീക്കറും, ബാസിനും ആഴത്തിലുള്ള ശബ്ദങ്ങൾക്കും സബ്‌വൂഫറും, ചുറ്റുപാടുനിന്നുള്ള ശബ്ദങ്ങൾക്ക് സറൗണ്ട് സ്പീക്കറുകളും സഹായിക്കുന്നു. ഇതിനു പുറമെ തലയ്ക്ക് മുകളിൽനിന്നുള്ള ശബ്ദാനുഭവം കൂടി നൽകുകയാണ് ഡോൾബി അറ്റ്‌മോസ് ചെയ്യുന്നത്.